Putin parla al pressa

Ego specta Putin parlante al pressa via le television. Il es un sublime experientia. Non tanto collocution como un monologo, interrupte per quasi retoric questiones. Parla un persona qui es tanto potente que ille non ha besonio de logica. Ille pote parlar como un religiose profeta, sin ulle logica; dicer que ille comprende le homines qui manifesta sur le Maidan al mesme tempore que ille non pote accordar se al facto que ille mesme homines manifesta pro facer cader le governamento de Yanukovych. 

An ille ha un adequate contacto con le realitate? Nos va vider… 

Memoria curte
Le memoria es un cosa volatile. Si ego ben memora, le campania electoral de presidente Yanukovych non era sin disturbationes e vexationes. Personas pertinente a altere partitos era fysicalmente attacate. Tal cosas anque occurreva a jornalistas. Del historia nos sape que un politico qui ha assumite le poter per vias fraudulente non pote expectar esser portate via del poter sin violentia, si ille non se dimitte voluntariemente.

Error de tactica?

Ego me demanda si le ancian presidente Yanukovych ipse provocava le rebelion que finalmente le ejectava del poter. Il sembla que ille voleva esser le habile politico qui per su habilitate de negotiator "ejocava" Russia e Europee Union un contra le altere. 

Spontanee populo
Secundo le medios le mesme fémina ha essite interviuate in Kharkov, in Krimea e in altere locos  ukrainian, ubi illa es vestite in differente habito ma appare como un representante del persecutite russos in le pais.

Differente historia
In omne paises post-communistic le varie gruppos etnic ha su particular historia. Secundo le russe e sovietic propaganda omnes qui parla in favor de un nationalismo que non es russe, es fascistas; iste "fascistas" vide le russos como barbaric communistas qui vole conquerer le mundo. In general on pote constatar que omne etnic gruppos memora le injurias que altere gruppos ha committite a illos, ma non le injurias que le proprie gruppo ha committite a alteres. Es necesse un dialogo, ubi omne partitos comprende le maneira de vider del alteres, ma isto es un multo difficile cosa. 

Proposition de Kissinger
Heri ego audiva per le radio que le olim ministro del exterior, Henry Kissinger habeva proponite que on proba attinger un compromisso ubi le occidente de Ukraina poterea approximar se a Europee Union durante que le principalmente russofone partes de Ukraina poterea haber un plus proxime contacto con Russia, e isto on poterea facer sin divider le pais.

Il non es certe que omne homines qui parla russo pro isto per necessitate vole viver in a appertiner a Russia, tanto que omnes qui parla anglese vole esser cives del Unite Statos.