Le follia in Syria

Ego seque le reportos de Syria e me demanda si le humanos es folle. Il ha plure versiones pro qual causa le guerra comenciava ma le facto es que on devasta un pais que ora es in un plus mal situation que antea, mesmo si le regime era un dictatura, ma – como ego lo comprende – ubi varie gruppos e religiones poteva conviver. Vos va audir le varie propagandistic versiones de omne partes mixate in le conflicto, ma illes qui suffre plus es le civiles, qui non vole plus que ducer un quiete vita, far su labor o studiar. Omne partes in le conflicto habe plus o minus le mesme scopo: combatter le terrorismo, ma naturalmente le terrorismo ha diverse aspectos, dependente del persona al qui tu face le question! Esque il non es tempore que omne partes cessa le guerra e comencia usar su sagessa, prudentia?

Ego comprende naturalmente que ego como un simple povre civil non pote haber influentia, ma forsan nos omnes pote juncte crear le necessari influentia. Isto es terribilemente naive, ma isto es lo que ego pote dicer: cessa le follia!

Aviones plus modic

Ego ha sempre credite que il es plus costose viagiar per avion, ma ego ora comprende que isto non es assi. In facto il es multo plus facil justo prender le avion. Le combination con treno e ferry es multo plus costose! Pro sanitari causas – ego habeva embilias pulmonari – le medico interdiceva a me volar per avion – ego debeva prender le ferry treno a Gdynia in Polonia e postea le ferry al urbe Karlskrona in Svedia. De Karlskrona ego continuava per treno a Uppsala. 

Le ferrys es tre interessante. On pote dicer que illos es quasi flottante citates o immense constructiones. On aborda le ferry per un corridor e subito, quasi sin que on lo remarca, on se trova juxta le reception del ferry. Ego notava que on scribeva Ben venita a bordo – naturalmente in anglese. :-) 

Ego era tanto fatigate post un nocturne viage per treno de Jelenia Góra a Gdynia in Polonia e un die de touristic sight-seeing in Gdynia, que ego al vespere simplemente me accostava al lecto e dormiva usque le hora 4 del matino, quando ego me eveliava e preparava al debordo. Le passage inter Gdynia e Karlskrona dura exactemente 12 horas. 

Karlskrona es historicamente un citate del Marina Svedese. Ora ego solmente videva le citate dum le passage del Terminal de Ferry al Station ferrovia de Karlskrona. Ego suppone que le citate es multo belle durante le estate – il ha multo de aqua e multe areas verde. 

Un modernitate le qual ego non ha probate antea era isto: ego comprava le billete via internet e lo pagava per mi carta de banca. Le billete (ticket) ego recipeva a mi mobil telefono (cellular telefono). Naturalmente non es importante si le ticket es sur papiro o sur le schermo de telefono, si on vide le cosa principalmente. Le sol risco, como ego comprende, es que on non ha currente electric in le bateria, le pila. 

Ja ante alcun minutas ante le hora 16 il era quasi totalmente tenebrose in Uppsala, un remarcabile differentia al longor del die in Jelenia G=ora in Polonia.