Yo passa sat mult témpor in Polonia, tant facticmen, que yo quelcvez percepte mi propri nativ land quam tre exotic. Un del exotic trates es que on quasi ne usa contant moné in Svedia - om paya omni vezes per cartes - ye tal gradu que yo ne save qual aspecta li max nov monetes e banknotes in Svedia!
Vu ariva del aeroport e vole prender un bus. Vu ne posse payar per moné, nam tro mult bus-choferes ha esset raubat e on ne vole havar contant cassas in li buses por ne atraher raubatores.
It ha aparet un movement in favor de contant moné, quel se consequentmen nomina li Contant Rebelion. Li membres de ti movement postula que omni buticas e altri venditorias accepta contant payaments.
Un chef-argument del propagatores del contant moné es li asertet problemas por oldi homines qui - on di - prefere usar contantes. In sved media on sovent parla pri li dificultás por oldones usar li pay-cartes, ma mi experientie es, que it es mult plu simpli payar per carte quam per fysic moné. Ci in Polonia on posse studiar li problemas del oldones serchante tri groszy che li cassa e duant persones sta in file post les, e li témpor passa...
E justmen quande yo scri ti missage, quam un ilustration del riscas pri sin-contant payada, media di, que li clientes de Swedbank ne posse usar lor cartes o far payamentes, nam hay problemas con li internet!
Ma retro al electronic payament, it existe un altri aspect quel li Rebels voluntarimen indica: Grand Fratre te observa! Tui bank save pri omni tui transactiones e deve responder, si Grand Fratre questiona. Ma li bank prefere que tu dona li information - un sorte de "desrespornsabilitada" o disclamer al láter del bank. Li cose posse esser ilustrat per lu quo evenit a me ante alcun témpor: Mi bank postulat que yo responde alcun questiones, ne del bank - it ya ja (!) save pri mi transactiones! - ma de alcun supervisori autorité, quel volet saver qualmen yo usa mi frugal pension por oldones. Li scope esset contr-agar lavada de moné! Yo posset far nul transaction per mi conto til yo hat respondet li quesitones. Mi problema ne esset que yo havet coses secret a celar - totmen ne! - mi problema esset comprender li ínprecismen formulat questiones! Yo devet contactar li client-servicie de mi bank e priscrir mi dificultá. Li bankari oficist savet qualmen responder li questiones e pos to yo denov posset usar mi bank-conto!
Ma dunc Grand Fratre: Compra un gelate in Milano o un pizza in Perú - tu bank - e in extension Grand Fratre - va saver si il crede que tu es un fripon qui lava moné! E il es tre suspetuosi!
Li protagonists de Contant Rebelion averti pri lu quo posse evenir si li electricitá es in panne; tande noi ne posse usar nor moné, ma noi anc ne va posser usar elevatores, intrar in nor doms e mem ne calentar li doms, nam omnicos es alimentat per electric curent! Ili obliva que anc un malign state posse devalorisar nor moné e in li casu que omnicos es contant noi crea un tre atractiv situation por criminales qui posse raubar nos, fortiar se in nor domos e furtar li moné quel noi ha celat sub li matrasse!
Finalmen omnicos ducte se al preparation contra accidentes: grand catastrofes. Ci it sufice considerar que contant moné postula multissimi transportes - imagina li distribution de monetes in micri valores quam un, du, quin cents o banknotes in grand valors! Li banks deve guardar li transportes de contant moné per quardatores con automatic carbines!
Li societé sin contants es tre practic, ma quam in omni altri camps on deve preparar se contra eventual riscas.
Inga kommentarer:
Skicka en kommentar